Matthew 2
1Yútiyaa-maravaken-kawaanako áwíꞋa Éróti máyon-kanaavimba Pétáremu-naopaꞋa Máríyaa Ísumba maránkarowasa némpakemba aaváúmó usópaken-kwaasi kawer-ímáyáágwárá-kwáásí teémesa Yérúsaremu-naopaꞋa tésa 2sésa Yútaa-kwaasiraꞋa kárákwiyinine sénamo maránkáín-iyampoi náávara ánkaraao. aaváúmó usaipáꞋá méta awánáúndaya moórá-oꞋa paárisata awánéta séta iyámpói maránkaraimba póta awánéta kwenáwíꞋa mósá maránáe séta teémeta túne siráawe.3suwaná marará-káwáánákó Éróti mináímbá isówana arunkó sáwíꞋa úwasa Yérúsaremu-naopakewaigwaraꞋa ísówana tirunkó sáwíꞋa úwana 4Éróti mono-káwáá-kwáásíyé ámáámba sun-kwáásíyé tááyowasa torupamái máyówana séna Áánútu aiꞋmaráníwaimba Káráísitimba marankánímba náávara ankáníyo súwasa 5sésa Yútiyaa-maravaꞋa Pétáremu-naopaꞋa ankáníye. Áánútun-aai simátímakowai agaimaréna séna
6
- Yútiyaa-maravaꞋa Pétáremu-naopaken-kwaasiyono. Yútiyaa-maravaꞋa kárákwiraawaivimba kentí naaópaꞋo kárákwiraawai íma tínaaempaꞋa máyáawe. kentí naaópakemba moóráwai paárurena kesí kwaási Ísareri-kwaasiraꞋa kaweꞋá umái kárákwiyiniye
12ámatuwesa tuún-kwáúwana Áánútu kaainampáꞋá simátimena séna Érótimba íma kosimáméro súwasa óꞋon-ampakemba kentí naaópaꞋa kóuraawe.
Ísumba áíꞋmaesarai ÍsípivaꞋa kurááyan-kwasai.
13kóúwana kwíyómpakemba Ísóigona kwayóꞋnákómbá Yósépi kaainampáꞋá awánówana séna Éróti miníyámpóí tuvuwíndayavena kwéavakaa-ivo usásine anówante miníyámpóíyé tíꞋmae Ísípi-maravaꞋa koménaꞋa aáno simáméꞋa áíꞋmae tiyó sénaumne súwana 14mindóꞋwáámbá usásinena anówante miníyámpóíyé tíꞋmaena Ísípi-maravaꞋa kwémena 15miváꞋá komáyowana Éróti pukáiye. naaóváꞋá Áánútun-aai simátímakowai sirónkaꞋa póna mirá uráiye. kwemá agaimaréna séna Ísóigo séna- Ísípi-maravakemba kesáánimba máyainaꞋa
- ááyaanana koyauweráníye
iyámpói tínkankaan-kwasai.
16Éróti awánómba aaváúmó usópaken-kwaasi kampaꞋá simáuwesa kóúwana Éróti arunkó áyámba úwana aaváúmó usópaken-kwaasi simámakon-aintavaiye oꞋá paáruraiyemo sirón-aintavaiye imáyáa éna évakarawai tiꞋmaréna séna Pétáremu-naor-ayampaꞋ-naopimpaꞋa kaer-ímó ten-íyámpóíyé ímo kaer-ímó tarén-iyampoiye tivakáá-umai tínkantuwaaro súwasa mirá uráawe.17naaóváꞋá Áánútun-aai simátímakowai áwíꞋa Yérémaya sirónkaꞋa póna mirá uráiye. kwemá agaimaréna séna
18
- Áráma-kwaasi ávááraumaimo iviꞋó taráamba ísaraawe. Áréseo aísaavutantamba uráan-kwaasi miwítí iyámpóíyavesa iviꞋá taawasá iyámpóímo pukáantavesa timambá aráápamai tínkaraawasa úwoi iviꞋá támae iráawe
Ísípivakemba tiráin-kwasai.
19Éróti puwúmba Yósépi Ísípi-maravaꞋa ména kwíyómpakemba Ísóigona kwayóꞋnákómbá kaainampáꞋá awánówana séna 20miníyámpóígómbá tuvuwónáe sen-kwáásí áꞋa púwóvo usásine anówante miníyámpóíyé tíꞋmae Ísareri-maravaꞋa kwaaó súwana 21usásinena awainínkónte ááninkonte tíꞋmaena Ísareri-maravaꞋa kúmba 22Éróti ááninko áwíꞋa Ákéreasi kwemá avowáná anondá Yútiyaa-ayampaꞋa kawáá-máyáí kwémayowana Yósépi iséna mináyámpáꞋó koménintavena inkaisúwana kaainampáꞋá Áánútu simámuwana Káríri-ayampaꞋa 23Násáreti-naopaꞋa tíꞋmaena koméraiye. naaóváꞋá Áánútun-aai simátímakowai sirónkaꞋa póna mirá uráiye. kwemá Ísuntavena séna- Násáretivaken-kwaasiye sénááowe
Copyright information for
KZE